CHUO KIKUU CHA TAIFA CHA ZANZIBAR KINAVYOWAJENGA WANAFUNZI KUJIAJIRI

Chuo Kikuu cha Taifa cha Zanzibar (SUZA) kimewataka wazazi na walezi waweze kuwapatia watoto wao elimu bora pamoja na maarifa yatakayo wawezesha kujiajiri wenyewe  wanapomaliza masomo yao chuoni.

Akizungumza Jijini Dar es Salaam kwenye maonesho ya 18 ya elimu ya juu Sayansi na Teknolojia yanayoendelea katika viwanja vya mnazi mmoja, Mkuu wa idara ya ujasiriamali wa chuo hicho, Dkt. Moh'd Salim Ahmed, amesema kuwa Chuo  wameongeza kozi mbili ikiwa ni pamoja na somo la ujasiriamali ambapo mpaka sasa wanafunzi wake wamekua wakifanya vizuri.

Dkt. Ahmed amesema kuwa wanafunzi wa Chuo wamekuwa wakijifunza kwa  vitendo pamoja na kutengeneza bidhaa mbalimbali kwa kutumia mimea.

"Hii kozi ni mpya lakini mpaka sasa tumeona matokeo mazuri kwa wanafunzi kwani wameweza kutengeneza vipodozi mbalimbali  kama vile lotion, Lipstic, mafuta pamoja na viungo vya kupikia" amesema Dkt Moh'd.

Amesema kuwa, kupitia kozi hiyo wanafunzi huwagawa  makundi ya kuanzia watu watano, hivyo wanaunda kampuni yao na wanafanya shughuli zao baadae huzisajili ili kwenda sokoni kwa ajili ya kununuliwa.

Mkuu wa Kitengo Cha Mahusiano na Masoko wa Chuo hicho, Khadija Mahumba, mesema kuwa, chuo hicho  kimeongeza kozi mbili ikiwemo ya shahada ya awali ya sayansi ya maabara pamoja na shahada  uzamili ya uendeshaji wa biashara na fedha ikiwa ni jitihada za chuo hicho kuhakikisha wanatoa elimu bora.

"Chuo kinatoa  Shahada ya Ujasiriamali na Ubunifu ambayo imekuwa msaada mkubwa kwa wahitimu kuanzisha biashara na kujitegemea kwa kujiajiri  hivyo amewashauri wazazi na walezi watembelee banda lao kujionea mazuri ya chuo" amesema