WAZEE WA KIMILA WA KIMASAI LAIGWANANI WAWEKA AZIMIO LA NAMALULU LA KUMSOMESHA MTOTO WA KIKE MPAKA PHD.

Na Mwandishi Wetu Simanjiro Manyara

Wazee wa kimila kutoka kabila la kimasai wamekubaliana katika kikao chao na uongozi wa Wilaya ya Simanjiro Mkoani Manyara kumsomesha mtoto wa kike mpaka kufikia ngazi ya elimu ya PHD katika azimio lijulikano kwa jina la Namalulu lililotolewa mwaka huu ikiwa ni jitihada za kumuwezesha mtoto wa kike na kuondokana na vitendo vya ukatili wa kijinsia hasa vitendo vya ukeketaji katika jamii hiyo.

Hayo yamebainika  wakati wa ziara ya Naibu Waziri wa Afya, Maendeleo ya Jamii, Jinsia,Wazee na Watoto Mhe. Dkt. Faustine Ndugulile alipokuwa akizindua kituo Maalum cha kuwasaidia wahanga wa vitendo vya ukeketaji cha Shirika la NAFGEM kilichopo Orkesumeti Wilayani Simanjiro Mkoani Manyara.

Azimio la Namalulu limefikwa na Wazee hao wa kimila mara baada ya kushamiri kwa vitendo vya ukeketaji katika jamii ya kimasai ya Simanjiro mkoani Manyara na kuamua kukata shauri na kuanza kubadilika na kutoa elimu ya kuachana na vitendo vya ukekeketaji katika jamii yao.

Akizunguzma na Wazee wa kimila kutoka kabila la kimasai Naibu Waziri wa Afya, Maendeleo ya Jamii, Jinsia, Wazee na Watoto Dkt. Faustine Ndugulile amewaambia wazee hao wa kimila kuendelea kushirikiana na Serikali na wadau katika kupambana na vitendo vya ukeketaji ambavyo vinamkandamiza mtoto wa kike.

Dkt. Ndugulile amesisitiza kuwepo kwa Kamati za Ulinzi kw\ Wanawake na  Watoto katika ngazi zote ili kuongeza nguvu katika mapambano dhidi ya vitendo vya ukeketaji vinavyofanywa na jamii ya kimasai katika Wilaya ya Simanjiro.

Naibu Waziri amesema Serikali imeweka Mpango Mkakati wa Kitaifa wa kutokomeza vitendio vya ukatili wa kijinsia dhidi ya Wanawake na Watoto wa mwaka 2016/2017 mpaka 2021/2022 wenye lengo la kuweka mikakti ya kuondokana na vitendo hivyo moaka nagzi ya kitongoji.

“Niseme tu Serikali tumejipanga na hatutokubali vitendo vya ukatili wa kijinsia hasa ukeketaji uendelee katika jamii zetu” alisema Dkt. Ndugulile.

Kwa upande wake Mkurugenzi Mtendaji wa Kituo cha Mtandao Kupambana na Ukeketaji Simajiro Bw.Francis Selasini ameishukuru Serikali kupitia Naibu Waziri Ndugulile kwa kushirikiana nao katika kuendeleza mapambano dhidi ya vitendo vya ukatili wa kijinsia hasa vitendo vya ukeketaji na mpaka sasa wameweza kuwakoa mabinti 15 ambao wamewasaidia kuendelea na elimu na maabinti wawili wapo vyuo vikuu.

Naye moja wa msichana aliyekimbia ukeketaji na ndoa ya utotoni Nagalali Molell amesema kuwa Shirka la NAFGEM limemsaidia kumsomesha na kufikia mpaka hapo alipo na kumuwezesha kumuajiri kufundisha wasichana wengine kushona.