MFUMUO WA BEI WAPUNGUA

Mkurugenzi wa Sensa ya Watu na Takwimu za Jamii, Ephraim Kwesigabo kutoka Ofisi ya Taifa ya Takwimu (NBS) akizungumza na waandishi wa habari leo jijini Dar es Salaam.

MWAMBA WA HABARI

Na Noel Rukanuga, Dar es Salaam

Mfumuko wa bei wa Taifa kwa mwezi Juni mwaka huu umepungua kutoka asilimia 3.6 hadi kufikia asilimia 3.4.

Akizungumza na waandishi wa habari leo jijini Dar es Salaam, Mkurugenzi wa Sensa ya Watu na Takwimu za Jamii, Ephraim Kwesigabo kutoka Ofisi ya Taifa ya Takwimu (NBS), amesema kuwa hali hiyo inatokana na kasi ya mabadiliko ya bei za bidhaa na huduma kwa mwaka ulioishia mwezi Juni mwaka huu kupungua ikilinganisha na kasi ilivyokuwa kwa mwaka ulioishia mwezi Mei mwaka huu.

"Kupungua kwa mfumuko wa bei kwa mwaka ulioishia mwezi Juni mwaka huu kumechangiwa na kupungua kwa mfumuko wa bei kwa baadhi ya bidhaa 

zisizo za vyakula" amesema Kwasigabo.

Amefafanua kuwa baadhi ya bidhaa hizo zisizo za vyakula zilizochangia kupungua kwa mfumuko wa bei ni bia asilimia 1.1, gharama za ukarabati wa vifaa vya umeme na viyoyozi kwa asilimia 1.8, gesi za kupikia majumbani kwa asilimia 5.6.

Bidhaa nyengine zilizochangia ni majiko ya mkaa kwa asilimia 2, gharama za mawasiliano kwa asilimia 2.6.

Kwasigabo ameeleza kuwa mfumuko wa bei kwa baadhi ya Nchi za Afrika  Mashariki ikiwemo nchini Uganda kwa mwezi Juni mwaka umeongezeka na kufikia asilimia 2.2 kutoka asilimia 1.7.

Kwa upande wa kenya mfumuko wa bei umeongezeka hadi kufikia asilimia 4.28 kutoka asilimia 3.95 kwa mwaka ulioishia mwezi Mei mwaka huu.