STAMICO YACHOCHEA MAGEUZI SEKTA YA MADINI KWA TEKNOLOJIA NA UONGEZAJI THAMANI

 

Dar es Salaam

Shirika la Madini la Taifa (STAMICO) limeendelea kuleta mageuzi katika sekta ya madini nchini kwa kuimarisha matumizi ya teknolojia za kisasa kwa wachimbaji wadogo, kuongeza thamani ya madini na kuwaunganisha wachimbaji na taasisi za fedha.

Akizungumza kuhusu mafanikio ya shirika hilo, Mkurugenzi Mtendaji wa STAMICO, Dkt. Venance Mwasse, amesema shirika limejikita katika kuhamasisha matumizi ya teknolojia zinazoongeza tija katika uzalishaji, kupunguza upotevu wa madini na kulinda afya za wachimbaji pamoja na mazingira.

Amesema STAMICO imeanzisha teknolojia ya Carbon-in-Pulp (CIP) kwa ajili ya uchakataji wa dhahabu, inayolenga kuongeza kiwango cha dhahabu inayopatikana wakati wa uchakataji na kupunguza utegemezi wa zebaki, ambayo ina madhara kwa afya ya binadamu na mazingira.

Teknolojia hiyo inatumika katika kituo cha mfano kilichoanzishwa kwa ajili ya kuwasaidia wachimbaji wadogo, hususan katika eneo la Geita, pamoja na kutoa fursa ya kujifunza mbinu bora za uchimbaji na uchakataji wa madini.

Aidha, STAMICO imepanua shughuli zake kwa kujikita pia katika kuongeza thamani ya madini mengine, ikiwemo chumvi. Kupitia juhudi hizo, shirika limesaidia kuanzishwa kwa kiwanda cha kisasa cha kuongeza thamani ya chumvi katika eneo la Kiroho, mkoani Mtwara.

Kiwanda hicho kinatarajiwa kuwasaidia wazalishaji kuboresha ubora wa bidhaa zao, kutumia teknolojia za kisasa na kuongeza ushindani katika soko, huku wakipata fursa ya kuuza bidhaa zao kwa thamani kubwa zaidi.

Hatua hizo ni sehemu ya juhudi za STAMICO za kuendeleza sekta ya madini, kuongeza tija kwa wachimbaji wadogo na kuchangia ukuaji wa uchumi wa taifa.