MANISPAA YA ILALA WAJIPANGA KUNYAKUA UMISSETA

Baadhi ya wachezaji wa mpira wa mkono manispaa ya ilala wakiwa katika mazoezi.

MWAMBA WA HABARI

NA NOEL RUKANUGA. DAR ES SALAAM

Manispaa ya Ilala imejipanga  kufanya vizuri katika mashindano ya michezo shule za sekondari (UMISSETA) yanayotarajia kutimia vumbi Mei 26 mwaka huu katika viwanja vya taifa jijini Dar es Salaam.

Mashindano hayo yanatarajia kuzikutanisha timu tano kutoka wilaya ya temeke, kinondoni, Ilala pamoja ubungo.

Akizungumza na waandishi wa habari jijini Dar es Salaam Mratibu wa Mashindano manispaa ya Ilala Mwalimu Haji, amesema kuwa katika mashindano hayo watashiriki michezo mbalimbali.

Amesema kuwa michezo hiyo ni pamoja na mpira wa miguu kwa wavulana na wasichana, mpira wa wavu, mpira wa kikapu, mpira wa mikono pamoja na sanaa ya kwaya, maigizo na ngonjera.

Mratibu huyo ameeleza kuwa maandalizi yote yamekamilika, huku mei 26 mwaka huu wakitarajia kuingia kambini kwa ajili ya kuanza mashindano hayo.

Amesema kuwa mwaka wa jana katika mashindano hayo walishika nafasi ya pili kati ya wilaya tano zilizoshiriki, lakini kwa mwaka huu ametamba kuchukua ubigwa katika mashindano yote watakayoshiriki.

Naye  kocha wa mchezo wa mpira wa mkono Mbwire Jeremia, amesema kuwa timu yake ipo katika hali nzuri ya kimchezo na wanatarajia kuleta ushindani mkubwa jambo ambalo litasaidia kushika nafasi ya kwanza.

Nahodha wa timu ya mpira wa mkono manispaa ya ilala Martin Emmanuel, amesema kuwa kikosi kipo katika mazingira mazuri katika mashindano hayo.

“Kocha ametufundisha vizuri, tayari ametupa mbinu zote ili kuhakikisha tunakuwa wa kwanza katika mchezo huu wa mpira wa mkono” amesema Emmanuel.