NHIF YAJA NA USHIRIKA AFYA ILI KUWASAIDIA WANAUSHIRIKA

NA TIGANYA VINCENT

RS TABORA

MFUKO wa Bima ya Afya nchini (NHIF) umeamua kuanza kutoa huduma za Bima ya Afya kwa wanachama wa Vyama vya Msingi vya Ushirika (AMCOS) chini ya Mpango wa  Ushirika Afya kwa ajili ya kuwawekea mazingira ya mazuri ya kuwapatia matibabu mwaka mzima.

Kauli hiyo imetolewa jana mjini Igunga na Mkurugenzi Mkuu wa NIHF Bernard Konga kwenye mkutano Mkuu wa 22 wa Chama Kikuu cha Ushirika cha Ingembensabo uliofanyika Wilayani Igunga.

Alisema BIMA imeona kuwa mwanaushirika anakuwa na uhakika wa matibabu kipindi cha mavuno na anapouza mazao yake lakini baada ya hapo anapata shida na ndio maana wamekuja na mpango wa kuwasaidia wanachama wa ushirika.

Konga alisema atakayejiunga na BIMA hiyo atakuwa na uwezo wa kupata matibabu katika vituo 6995 ambavyo Mfuko huo umeingia navyo mkataba nchini kote kwa ajili ya kuwahudumia wanachama wake.

Aliongeza kuwa mkulima uwa na msimu mmoja katika mwaka mmoja na unapokwisha ungojea mwaka mwingine ndio apate fedha jambo ambalo linawafanya wauze mali zao kama vile mashamba ili kupatiwa matibabu.

Mkurugenzi Mkuu huyo aliongeza kuwa kwa kuanzia Mfuko huo utaanza na Ushirika ulio katika mazao makuu matano ya biashara ambayo ni pamba, tumbaku, chai kahawa na korosho na baada ya hapo watakwenda ushirika mazao mengine.

Konga alisisitiza  baada ya mazao hayo watakwenda kwenye wanaushirika wengine kwa  lengo ni kuwafikia Wanaushurika wote ili waweze kufanyakazi zao za uzalishaji wakiwa na afya bora na kuwa na uhakika wa matibabu.

Naye Mkuu wa Mkoa wa Tabora Aggrey Mwanri alitoa kwa mifuko mingine ya bima kuangalia hata wa uwezekano wa kuzikatia Bima majumba ya kuhifadhia mazao ya wakulima ili kuwakinga na hasara pindi yakitokea majanga kama vile moto.