MAJALIWA MGENI RASMI KONGAMANO LA KIBIASHARA

Waziri Mkuu Kassim Majaliwa anatarajia kuwa mgeni rasmi katika Kongamano la Kibiashara kati ya Wafanyabiashara watanzania na Wafanyabiashara wenye makampuni kutoka nchini Sweden litakalofanyika jijini Dar es Salaam Machi 12 hadi 13 mwaka huu.

Akizungumza na wanahabari jana jijini humo Rais wa Chemba ya Wafanyabiashara wenye Viwanda na Kilimo Tanzania (TCCIA), Paul Koyi alisema kongamano hilo la siku mbili litakutanisha wafanyabiashara wa nchini na kutoka Sweden lengo likiwa kuangalia fursa za uwekekezaji katika sekta zote ikiwemo viwanda, biashara na kilimo.

“Tunatarajia Mgeni Rasmi atakuwa Waziri Mkuu kongamano hili litaleta msukumo wa kibiashara litawasaidia wafanyabiashara kuchangamkia fursa za uwekezaji kwa kushirikiana na wenye makampuni Wasweden,” alisema.

Alibainisha kuwa mwaka jana kongamano lilifanyika katika Mji wa Stockholm na kwamba mwakani litafanyika Rwanda huku akisisitiza limedhamiria kutekeleza sera ya uchumi wa viwanda ya Serikali ya Awamu ya Tano ya Rais Dkt. John Magufuli.

Aliwaomba wafanyabiashara wote waliojiandikisha kuhudhuria kongamano kwani litawafungulia fursa nyingi za kibiashara watapokutana na wenye makampuni kutoka Sweden.

Kwa upande wake Balozi wa Tanzania nchini Sweden Dkt. Wilbrod Slaa alisema Wafanyabiashara Wasweden wenye makampuni hawawezi kuwekeza peke yao bali wanapenda kuwekeza kwa mtindo wa ushirikiano.

Alizitaja miongoni wa kampuni kutoka nchini humo zitakazoshiriki ni Kampuni ya Volvo inayojishughulisha na utengenezaji wa magari madogo na makubwa pamoja na Kampuni ya Apple Energy.

Mwenyekiti wa Chemba hiyo kutoka Sweden upande wa nchi za Jumuiya ya Afrika Mashariki (SWEACC), Jan Furuvald alisema kongamano litafungua fursa za kibiashara kupitia uwekezaji wa sekta mbalimbali utakaojumuisha watanzania na Wasweden.