TAASISI YA MARCUS MWEMEZI YATOA ELIMU JUU YA UGONJWA SONONA KWA WAKAZI WA DAR ES SALAAM

Takwimu zinaonyesha kuwa mmoja kati watu wanne hapa nchini anatatizo la Sonona, Na Sonona ni ugonjwa unaoathiri watu wengi sana bila wao wenyewe kujijua mpaka tatizo linapokuwa kubwa.

Mkurugenzi Mtendaji wa Taasisi ya Marcus Mwemezi Foundation Bi. Belinda Y. Nyapili akitoa ufafanuzi wa jambo fulani mapema wiki hii katika semina za jinsia na maendeleo.

Hayo yamesemwa na Mkurugenzi Mtendaji wa shirika la Marcus Mwemezi Foundation Bi. Belinda Y. Nyapili mapema wiki hii katika Semina za Jinsia na Maendeleo (GDSS) wakati akiwasilisha mada ya athari za ukatili wa kijinsia katika afya ya akili.

Mkurugenzi huyo alisema kuwa Sonona ni ugonjwa wa akili ambao kwa kawaida umekuwa ukipewa majina mengi sana kama Ukichaa, Uchizi, Utaira, Wendawazimu nk. Lakini pia dalili zake siyo za moja kwa moja kama ugonjwa mwingine na inahitaji utashi wa hali ya juu kumgundua mtu anayeanza kuugua ugonjwa huu wa Sonona.

Aidha aliendelea kusema kuwa visababishi vya ugonjwa huu ni vingi na vinategemea na wakati na hali iliyomkuta mgonjwa, Na kuvitaja baadhi kuwa ni kuachishwa kazi, kuachwa na mpenzi wako, kufiwa na mtu wa karibu aidha mke kufiwa na mumewe aliyempenda sana au mume kufiwa na mkwe, Unyanyasaji wa kupita kiasi na mengineyo.

Aliongeza kuwa Sonona ni ugonjwa ambao pia unaweza kusababisha mtu akajiua ama kujidhulu endapo atafikiri kwa muda mrefu bila kupata majibu, Na kuendelea kusema kuwa dalili za mtu menye maradhi haya ni kupenda kujitenga na watu ambao mwanzoni alikuwa akichangamana nao, Kuwa na huzuni iliyopitiliza, Unywaji wa pombe kupita kiasi. Na endapo utaona kuna ndugu yako au mtu wako wa karibu anadalili hizo unaweza kuonana na wataalamu wa Saikolojia kwa msaada zaidi.

Mwanaharakati Nyanjura Kalindo Akichangia mada katika Semina ya Jinsia na Maendeleo mapema wiki hii.

Kwa upande wake Mwanaharakati Nyanjura Kalindo alisema kuwa ukatili wa kijinsia katika Nyanja ya uchumi inaweza kuwa ni kisababishi kikubwa cha ugonjwa huu na kuwataka watanzania kuvunja ukumya na kukemea kwa nguvu zote maswala haya ya ukatili wa kijinsia ili kuweza kupunguza tatizo hili.

Aliendelea kusema kuwa ukatili wa kingono ikiwemo Ubakaji, Ulawiti pamoja na rushwa ya ngono vikikemewa kwa nguvu zote itasaidia kwa kiasi Fulani kupunguza tatizo hili la Sonona ambalo linaathili kwa kiasi kikubwa Uchumi na nguvu kazi ya Taifa.

Na mwisho aliwataka Watanzania wote kuweza kupaza sauti kwa pamoja kukemea vitendo vyote ambavyo ni visababishi vikubwa vya ugonjwa huu na kutaka Taasisi binafsi pamoja na Serikali kujitahidi kutoa elimu kwa wananchi jinsi ya kujiepusha na tatizo hili.