- MWAMBA WA HABARI

Na Muandishi Wetu

Mwamba wa habari

Benki kongwe ya kibiashara nchini Tanzania KCB imetoa kiasi cha shilingi million 420 kudhamini ligi kuu ya mpira wa miguu Tanzania Bara(VPL) kwa msimu wa mwaka 2018/2019.

Akiongea na waandishi wa habari katika makabidhiano ya hundi hiyo mapema leo jijini Dar es salaam Mkurugenzi Mtendaji wa KCB benki Bw. Cosmas Kimario alisema kuwa hii ni mara ya pili kwa KCB kudhamini mashindano hayo.

“Hii ni mara ya pili tunakutana katika hoteli hii ya Serena kwa kuwa tulishakaa kikao kama hiki kwa mwaka jana kati ya KCB Benki na chama cha Mpira wa Miguu Tanzania (TFF) kwa lengo kama hili la kusaini mkataba wa udhamini wa Ligi Kuu Tanzania Bara”. Alisema Kimario

Katika udhamini huo KCB Bank imeongeza thamani ya udhamini wake katika ligi hiyo kutoka kiasi cha shilingi za Kitanzania 325,000,000 msimu wa 2017/18 mpaka shilingi 420,000,000 msimu wa 2018/19 huku ongezeko likiwa ni ziadi ya milioni 90,000,000,

Aliongezea kuwa benki ya KCB ina nia thabiti ya kukuza na kuendeleza michezo hapa nchini na ndio maana imeamua kuwekeza katika ligi kuu Tanzania bara, lakini pia inaangalia uwezekano wa kuendelea kudhamini ligi nyingine kama ligi daraja ya kwanza na nyinginezo.

Kwa upande wake Rais wa TFF Wallace Karia alisema kuwa tusiwe na utaratibu wa kuziogopa benki kwani mabenki yana pesa nyingi ambazo zinahitaji watu wanaoweza kuzitengenezea njia nzuri ili ziweze kujizalisha na kuleta faida kwao na kwetu sisi tunaopewa udhamini.

Aliendelea kusema kuwa kama tulivyoshirikiana vizuri kwa mwaka jana hivyo hivyo tutaonyesha ushirikiano mzuri kwa mwaka huu kwa benki ya KCB kwa kuwa ni watu ambao wapo karibu sana na sisi na ni watu wanaozijua vizuri shida zetu.

Kaimu Menyekiti wa Bodi ya KCB Bank Tanzania, Bi. Fatma Chillo alisema kuwa ni fursa ya kipekee kuweza kudhamini Ligi Kuu Tanzania bara kwa msimu wa pili. “Lengo letu ni kuleta hamasa kwa timu na mashabiki wa mpira wa miguu kwa kuzijengea timu, hata zile ndogo uwezo wa kifedha ili kuziwezesha kushindana kikamilifu hivyo kuongeza ushindani ndani ya ligi.” Alieleza Bi. Chillo.

Rais wa TFF, Nd. Wallace Karia aliishukuru KCB Bank Tanzania kwa kuidhamini Ligi kuu Vodacom jambo ambalo alisema litasaidia kufanikisha msimu huu wa ligi kuu 2018/19. Pia alizitaka taasisi zingine na watu binafsi kuiga mfano huo kuweza kutoa michango ya hali na mali ili kukuza maendeleo ya soka kwa timu za ligi kuu.

Rais wa Chama cha Mpira wa Miguu Tanzania (TFF) Wallace Karia Akiongea na waandishi wa habari leo Serena hotel jijini Dar es salaam.

Mkurugenzi Mtendaji wa KCB Benki Tanzania Bw. Cosmas Kimario akiongea na waandishi wa habari mapema leo jijini Dar es salaam.

Mkurugenzi Mtendaji wa benki ya KCB Tanzania, Cosmas Kimario na Rais wa Shirikisho la Mpira wa Miguu nchini Tanzania Bw. Wallace Karia wakikabidhiana mkataba baada ya kusaini Udhamini wa Ligi Kuu ya Tanzania wenye thamani ya shilingi milioni 420 .