WAZAZI, WALEZI WATAKIWA KUSAIDIANA NA WALIMU KUWAREJESHA WATOTO WALIOTOROKA MADRASA

Na Masanja Mabula –Pemba . 

mwambawahabari

WAZAZI na walezi wa watoto kisiwani Pemba wametakiwa kushirikiana na walimu wa madrasa  kuwashajihisha watoto waliotoroka vyuoni kurejea na kuendelea na masomo yao .

Lengo kutaka kurejeshwa madrasa watoto hao ni  kuisoma dini yao na kuifahamu  ili waweze  kukabiliana na changamoto mbali mbali    za  utandawazi.

 Wito huo umetolewa jana na  msaidizi mwalimu Mkuu wa madrasatul Rahman iliyopo Chanjamjawiri Gereji chakechake Pemba Ustadhi  Suleiman Khamis Mohd alipokuwa akizungumza na mwandishi wa habari hizi  .

Ustadhi Mohd amesema, kwa sasa hali imekuwa tofauti na zamani  kwani watoto wengi kike na kiume wanapofikia umri wa kuanzia  miaka 15 hutoroka vyoni na kushuhulikia  zaidi na masomo ya kidunia  na wengine  kuzurura   mitaani na hatimaye hutumbukia katika matendo maovu  yakiwemo ulevi na mapenzi  katika umri mdogo.

Amesema ,  bado wazazi hawajawa na muamko kuhakikisha kuwa watoto wanapata elimu ya dini ya kiislamu  ambayo  imeshushwa hadhi  kulinga na wazazi pamoja na watoto kutoipa kipaombele .

 Aidha amesema ,licha ya madrasa hiyo kutoa mafunzo ya fani tofauti kwa wanafunzi ikiwemo  sira, hadithi za mtukufu mtume Muhammad SAW, lugha ya kiarabu na kiengereza , lakini pia wanatoa mafunzo ya compyuta kwa wanafunzi waliomaliza mashafu ili kuwajenga kitaaluma  zaidi ya kupambana na mazingira ya ulimwengu wa leo  popote wanapokua.

 Ustadh Mohd amefahamisha, licha ya kuwepo kwa juhudi kubwa wanazozichukua kuwasaidia wanafunzi katika madrasa yao  lakini bado  wanakumbana na changamoto kubwa zinazokwamisha juhudi hizo ikiwemo  uhaba wa compyuta na walimu wa lugha ya kiarabu na kiengereza.

 Amesema kuwa inafikia hadi compyuta moja kutumiwa na wanafunzi wawili hadi watatu kwa wakati mmoja na  kulazimika kuwagawa wanafunzi hao katika vipindi vitatu tofauti hali inayopelekea ugumu kiasi fulani.

Ametoa wito kwa serikali, taasisi na watu binafsi kujitokeza kusaidia madrasa hiyo kwani wapo kwaajili ya Allah SW hivyo kutoa kwaajili ya Allah kuna kheri kubwa huko tuwendako.

Amemalizia kwa kuwataka wazazi na walezi kushiriki kikamilifu katika vikao vya madrasa sambamba na kuchangia ada kwa ajili ya walimu waliojitolea kufanya kazi hiyo ngumu inayohitaji uvumilivu wa hali ya juu ili kuwatia moyo wandelee kufanya kazi.