CDF YAFANYA KONGAMANO KUBWA LA SAUTI ZA WASICHANA JIJINI DAR ES SALAAM

Mimba, Ndoa za utotoni na Ukeketaji bado changamoto kubwa sana kwa taifa, hivyo serikali tunaiomba kushirikiana na asasi za kiraia kutokomeza mambo haya ikiwa ni pamoja na kubadilisha sharia ya mtoto wa kike kuolewa chini ya miaka 18.

Baadhi ya wasichana kutoka mikoa mbalimbali ya hapa nchini wakifuatilia Kongamano kwa umakini.

Hayo yamebainishwa mapema leo jijini Dar es salaam na Mkurugenzi Mtendaji wa Jukwaa la Utu wa Mtoto (CDF) Bw. Koshuma Mtengeti kwenye Kongamano la Sauti ya Wasichana lililofanyika kwenye chuo Kikuu Kishiriki cha Dar es salaam (DUCE) huku waandaaji wakiwa ni CDF.

Kongamano hilo la siku mbili lililoandaliwa na Jukwaa la Utu wa Mtoto (CDF) kwa kushirikiana na Chuo Kikuu Kishiriki cha Elimu Dar es salaam (DUCE) chini ya ufadhili wa shirika la FORWARD UK na Ubalozi wa Uswidi Tanzania, na kuwakutanisha wasichana zaidi ya 150 kutoka mikoa ya Mara, Dodoma, Mwanza na Dar es salaam.

Mkurugenzi huyo alisema kuwa lengo kuu la kongamano hilo ni kuwajengea uwezo watoto wa kike kuweza kujitambua na kutambua haki zao pamoja na kuchukua hatua stahiki pale ambapo haki zao zinavunjwa.

Aliongezea kuwa Ukeketaji bado ni kitendo kinachozidi kuchukua nafasi kubwa hapa nchini, Na kusema kuwa mwaka huu ni msimu wa ukeketaji na baadhi ya maeneo watoto wameshaanza kukeketwa, hivyo sisi kama watetezi wa watoto hawa tunahitaji kuona serikali inachukua hatua stahiki juu ya watekelezaji wa vitendo hivi.

Aidha kongamano hilo litawahusisha wadau wa mtoto wa kike pamoja na washirika wa CDF kwenye mradi wa binti ambao ni UMATI na Wadada Centre, lakini pia kongamano hilo litakuwa ni sehemu ya maadhimisho ya siku ya mtoto wa kike duniani kwa mwaka 2018 yenye kauli mbiu isemayo

“Imarisha uwezo wa mtoto wa kike tokomeza Ukeketaji, Mimba na Ndoa za Utotoni”

Kwa upande wake DR. Ikupa alisema kuwa wao DUCE wananafasi kubwa ya kuwatengeneza walimu ambao ndio wanaenda kuwalea watoto huko mashuleni na huko watakutana na watoto mchanganyiko ambao wengine wametoka katika mila kandamizi na maeneo mengine mengi.

Aliendelea kusema kuwa chuo chao kimeshirikiana ipasavyo na CDF katika kuhakikisha wanawajengea uwezo watoto wa kike hawa ili waweze kujiamini, kujitambua, na kuweza kupambana kushiriki katika nafasi mbalimbali za kiserikali, Kiuchumi na ukombozi wa mwanamke.

Mkurugenzi Mtendaji wa (CDF) Bw. Koshuma Mtengeti akiongea na waandishi wa habari mapeama leo jijini Dar es salaam katika Kongamano la Siku ya Wasichana 2018.