WILAYA YA DODOMA YAZINDUA KAMPENI YA MAGAUNI MANNE YENYE LENGO LA KUPINGA MIMBA ZA UTOTONI

Mwambawahabari

Jumla ya shule za Sekondari 9 ambazo ni baadhi ya shule zilizopo katika Manispaa ya Dodoma leo Machi 10 zimeweza kushiriki katika kampeni ya Kihistoria ya kupinga vita mimba za Utotoni hasa kwa wanafunzi wa Shule za Msingi na Sekondari katika kampeni inayoendeshwa na Mkuu wa Mkoa wa Wilaya hiyo ya Dodoma, Bi. Christina Mndeme inayoitwa ‘Magauni Manne.

Awali Kaimu Mkurugenzi wa Manispaa ya Dodoma, Bi. Idaya Maenda amebainisha kuwa, suala la mimba za utotoni ni kubwa kwa Manispaa hiyo hivyo anampongeza Mkuu wa Wilaya ya kuanzisha kampeni hiyo ya magauni manne kwani itasaidia kuwajenga wanafunzi kupenda masomo na kukataa vishawishi.

“Tunaomba hatua za haraka zichukuliwe. Pia ushirikiano baina ya wazazi na Serikali kwani Wazazi wengi wamekuwa wakikwamisha zoezi la kupambana na mimba za utotoni kwa kuwakataza watoto wanaopata mimba kuwataja ama kuwafichua wanaume wanaowapa mimba hizo.

Hali ya mimba kwa Manispaa inatisha kwani Shule za Msingi jumla ya wanafunzi 6, wameweza kupata ujauzito kwa kuanzia 2016 mpaka sasa. Ila kwa takwimu za shule za Sekondari , jumla ya wanafunzi 54 wameweza kupata mimba kwa mwaka 2016. Kwa takwiamu za mwaka huu 2017. Kwa kipindi cha Januari hadi mwezi huu wa Machi, zaidi ya wanafunzi 18, wamepata ujauzito na kufanya kwa kipindi chote cha 2016-2017, kuwa na jumla ya wanafunzi 74, Hali hii inatisha sana hivyo tunaamini kampeni ya magauni manne itasaidia kuwajenga watoto kukataa vitendo vya kishawishi.” Amesema Bi Idaya Maeda.

Akizungumza wakati wa kuzindua rasmi kampeni hiyo Mkuu wa Wilaya ya Dodoma, Bi Christina Mndeme amebainisha kuwa, ili kuweza kupinga vita ya mimba za utotoni amewataka wadau kwa pamoja kumuunga mkono katika sualla hilo huku akiimiza ushirikiano kwa wazazi na walimu katika kumfuatilia mtoto wao wakati wote wa masomo.

“Tunawaomba sana. Wazazi kuwa na wakati wa kuwa karibu na watoto wenu. Kujua wanasoma nini shuleni na pia kujua tabia zao mara kwa mara. Pia nitoe wito tu, watoto wangu, kataeni kushawishiwa na waendesha bodaboda. Kataeni ofa zao kwani ndizo zinawasababishia vishawishi na kupata ujauzito.

Tutakae mbaini akiwarubuni wanafunzi hasa vijana wa bodaboda na nyie wauza Chipsi huko mitaani basia hatua kali zitachukuliwa. Tuwaache watoto wetu wasome na watimize malengo yao katika mustakabali huu wa magauni manne” alieleza Mkuu wa Wilaya huyo Bi. Mndeme.

Mkuu wa Wilaya amebainisha kuwa, suala la mimba za utotoni ni kubwa hivyo ameamua kuanzisha kampeni hiyo na anaamini itafanikiwa kwa kiasi kikubwa ni itamjenga mwanafunzi kutimiza malengo yake, ambapo Magauni manne ikiwa na maana ya gauni la kwanza ni vazi la shule kwa mwanafunzi huku gani la pili ni Joho la mwanafunzi wakati wa kuhitimu kiwango chake cha elimu ya juu ambacho Taifa inakitaka kwa watu wake kuanzia elimu ya chini mpaka ya juu, hivyo hivyo kwa gauni la tatu ni la Harusi ambalo tayari ameshamaliza elimu yake na anaweza kuamua kile alichokuwa anakitamani muda mrefu huku gauni la mwisho ni lile la ujauzito ambalo alikuwa na ndoto nalo kwa muda mrefu.

Aidha, katika tukio hilo pia limeweza kushuhudiwa na watu mbalimbali akiwemo Mbunge wa Dodoma Mjini Antony Mavunde, Mbunge wa viti maalum Bi. Felista Bula. Pia walikuwepo Mc Pilipili, Maimatha Jese na wengine wengi ambao ni wazawa wa Mkoa huo wa Dodoma.

Kaimu Mkurugenzi wa Manispaa ya Dodoma, Bi. Idaya Maenda akielezea wakati wa mkutano huo

Mwanadada Maimatha Jese akitoa maelezo mafupi na ya kuwapa moyo wanafunzi wa kike katika kuzingatia masomo na kuepuka mimba za utotoni.

Mbunge wa viti maalum Dodoma, Bi. Felista Bula akiwaelezea jambo wanafunzi hao wakati wa uzinduzi wa kampeni hiyo

Mbunge wa Dodoma Mjini Antony Mavunde akizungumza katika mkutano huo

Mkuu wa Wilaya ya Dodoma, Bi Christina Mndeme katikati akifuatilia matukio yaliyokuwa yakiedelea

Mkuu wa Wilaya ya Dodoma, Bi Christina Mndeme katikati akiwa na wanafunzi wakionesha alama ya vidole vinne kuashiria kampeni ya magauni manne. Kulia ni mwendesha shughuli MC Pilipili