TAKE ONE YA CLOUDS TV YAFUNGIWA

NA MARIA KAIRA, 

Mwambawahabari

KAMATI ya Maudhui ya Mamlaka ya Mawasiliano Tanzania (TCRA) leo imekifungia kipindi cha 'Take One' kinachorushwa na kituo cha runinga cha Clouds  kwa kipindi  cha miezi mitatu mfululizo kuanzia leo hii.

Makamu Mwenyekiti wa Kamati hiyo, Joseph Mapunda  amesema kuwa kipindi hicho kimefungiwa baada ya kukirusha kipindi hicho Agosti 9, 2016 ambacho kilikiuka kanuni za huduma za utangazaji (Maudhui) za mwaka 2015.

Kipindi hicho kimefungiwa kutokana na mtangazaji wake Zamaradi Mketema  kufanya mahojiano na Gift Stanford alimaarufu 'Gigy Money.

Aidha kamati hiyo imeweza kutathimini na kubaini kuwa kipindi hicho kilikiuka maadili na kanuni za utangazaji.

Pia Mapunda amesema, kipindi hicho pia kimeingilia masuala binafsi ya watu kwa kuyaweka wazi na kutaja majina bila ya ridhaa yao. Kipindi hicho pia kimedaiwa kuwa na mwelekeo wa kuhamasisha vijana kufanya biashara ya ngono ili kujipatia fedha.

Amesema kamati hiyo imetoa onyo kwa kituo cha Clouds Television kwa kukiuka Kanuni za Huduma za Utangazaji (maudhui) 2005.

Kipindi cha Take One kinafungiwa kwa kipindi cha miezi mitatu kuanzia leo, katika muda huo wa kufungiwa, Clouds inatakiwa kukitathimini kwa lengo la kupata njia bora ya kukiendesha na kupeleka mapendekezo TCRA kwa ajili ya kuridhia kabla ya kipindi hicho kufunguliwa," amesema.

"Clouds Television inapewa onyo kali kwa kukiuka kanuni za Huduma za Utangazaji (Maudhui) 2005 Na. 5 (c,d,e,f,) na 9 (1), 14 (1) na 15 (c)," amesema na kuongeza.

Hata hivyo  Mapunda amesema kabla ya kamati hiyo kutoa maamuzi hayo, uongozi wa Clouds Television ulitoa utetezi wake.

"Mapunda amesema haki ya kukata rufaa dhidi ya uamuzi huo katika Baraza la  Ushindani wa Haki na Biashara uko wazi ndani ya siku 30 kuanzia leo".